Plattdeutsche Geschichte von Marianne Ehlers
Dor sünd wi uns doch all enig: Unse Halfinsel Eiderstedt is schöön, un dat ümmer, dat ganze Johr över. In‘t Fröhjohr is dat bi uns besünners fein. Wenn dat op Oostern togeiht, denn staht de Oosterklocken an de Straten in vulle Blööt. Överall lücht dat geel, mitünner ok witt-geel – eenfach smuck! Un wenn denn noch de Sünn schient, denn geiht mi so richtig dat Hart op. Ach kiek, un op de Fenn drifft sik al en Oosterhaas rum. Un nich lang, denn suust noch een an de Gravenkant langs. En Kiwitt schimpt luut vör sik hen – wat fein, he is noch dor un hett sik villicht al en Nest buut.
En Lünk hett sik dat in den bunten Vagelkassen kommodig maakt. Egentlich is de för de Meisen dacht, man dat Lock is groot noog, de he dor rinpassen kann. Na denn man to, denn maak du man dien Jungen groot. Un de Meis nimmt en anner Kassen. De eerste Swulk hett sik ok al wiest – wo de denn woll düt Johr bröden will? Nich so geern in’n Stall, denn gifft dat soveel Swulkenmist. Lever schull se man buten ünner’t Dack en Nest torechtmaken. Blots so en Vagel maakt ümmer, wat he will. Kannst as Minsch nix bi maken, un dat is denn ok goot so.
En plattdüütschen Dichter hett mal en Gedicht över dusend Sorten Gröön schreven – un wenn ik mi so umkieken do, denn stimmt dat ok. Soveel verscheden Grööns sünd nu to sehn. De Fenn is gröön, satt un saftig. De Bööm sünd anners gröön, so hell un zoort, de Diek nochmal anners. Un dor sünd denn ok all de Schaap mit de lütten Lammer! Wat mag ik dor geern mal langslopen un mi freuen.
De Idee hebbt ok veel Lüüd vun annerswo her, fröher see man „Badegöös“, vundaag seggt man „Touris“. De mehrsten sünd in St. Peter to finnen, aver ok woanners köönt wi welk drapen. De hebbt ok al mitkregen, wo schöön dat bi uns is! Dat gifft welk, de sünd jedes Johr hier – un dat nich blots in’n Sommer.
Ja, wi hebbt dat würklich schöön. Un wi hebbt Glück, wi köönt dor wahnen, wo anner Lüüd Urlaub maken doot. Dat is doch en Geschenk! Un denn noch op de schöönste Halfinsel, de ok in’n Harvst un in’n Winter richtig veel Godes hett. Sik vun den Wind dörpuusten laten, veel frische Luft tanken – un achterna fein Kaffe un Koken, un villicht ok en lütten Pharisäer? Nochmal, op unse Halfinsel Eiderstedt kann man sik dat so richtig gootgahn laten!